Hanfstengel – Stormarner Tagesblatt

drucken
Hanf

SHZ.de – URL: http://www.shz.de/

STORMARNER TAGEBLATT

Hanfstengel

08. Januar 2013 | 00:00 Uhr | Von Leonhard Hundfsdoerfer

Beste Isolierung för Hüüser, Autos un Fleeger

Ick freu mi jümmer, wenn mi ein to verstoahn gifft, dat hei mien plattdüütsche Kolumne in uns Dagblatt leest hätt. „Na, da hast Du ja dolle
Sachen mit Hanf gemacht“, säh Wolfgang Rolf, Autohändler in Trittau, to mi. Wi sünd Schaulfrünn, hebb uns bi de Sparkass droapen, un ick freu mi. Weit ick doch nu, dat hei an Vörmeddag, bi all den Stress in sien Autohuus, mien Artikel öber den harmlosen „Arbeitshanf“ leest hätt. Weck Lüüd wütt ock weeten, ob uns Rinder uut England all doar sünd. Bald alle Peertüchter hebb mien Artikel geigen dat Brennverbot bi Foahlen leest. Sonn brisante Soak geiht vun einen ton anern.

Ick heff ock mal ein ganz leiben Breif vun ein Familie kreegen. To de Tied heff ick bericht, dat ick ein lütte Swalk (Schwalbe), ein reinet Küken, mit Hack, Eier un Fleigen grootkreegen heff. Un dat se Joahr för Joahr up unsen Hoff trüchkeum. Wat ähnlichet harr de Familie up ehren Burenhoff ock belewt. Ein Dame hett mi mal schreeben, dat ick ein gauden Dichter weur. Doartau hett se mi ein vun ehre Gedichte tauschickt. Un dat weur beeder ass miene!

Ein ganz dulle Reaktion heff ick kreegen, ass ick mal in mien Kolumne dicht heff. Ick heff da öber uns lütten Philip schreeben, Gott, nu is de Jung all föftein, aber damals weur hei ganz lütt. „Uns Philip is dat scheunste Kind, dat man in Schleswig-Holstein findt“. Drei Opas un ein Oma hebb mi schreeben, ick müss mi irren. Ick kann höchstens den tweitscheunsten Enkel hebben, den scheunsten harrn nämlich se sülben.

Aber nu, kort vör Wiehnachten, is mi wat Besünneres passeert. De Boss vun ein groote Mineralölfirma in Jesteburg un Ahrensburg wull sien Fruu öberraschen. Se hett nämlich mien Artikel leest, wo ick schreeben heff, dat ick in miene Lehrtied mit Hanf to dauhn harr. Nich mit den to smöken, ne mit den ganz normalen Hanf, wo se to de Tied Hanfseile vun moakt hebb. De Artikel hett de Dame allerbest gefollen, denn se hätt vör kortem de Firma „Hanf-Schnitt-Nord GmbH“ gründt.

Se un ehr Mann sünd noch an Anfang un hebb blot ein lüttes Feld anbuut. Aber se hebb Kontakte to Firmen, de Hanfprodukte herstellt. Dat is bald nich to glöben, wat man mit Hanfstengel un Samen allens herstellen kann. Hanf leebert de beste Isolierung för Hüüser, Autos un Fleeger. Is ganz licht un hätt einen högeren Dämmwert ass Mineralwull. Un denn dient Hanf de Gesundheit.

Hanföl is ein ganz gesunnes Speiseöl, ein Hautpflegeöl un wirksam geigen alle meuglichen Beschwerden. Un all dat, wieldat disse Hanf ein ganz ein niedrigen THC-Gehalt hätt. In Geigensatz to den Marihuana-Hanf.

Ick heff de Dame mien Artikel kopiert un doartau schreeben, dat ick disse urwüchsige Naturplant gern mag!

Schreiben Sie einen Kommentar